القلب موجوع
والجرح غاير فى الضلوع
ودمى سايح فى الشوارع
بيسبح بحمد الله وحب الوطن
*****
التتار هدوا الجوامع والبيوت
خالفوا المواثيق والعهود
داسوا على الشرف المصون
آه بتصرخ جدران السجون
*****
آه من اللى باع
واللى خان
آه من كل ندل وجبان
*****
يا عينى مكتوب عليكى البكا
يا دموعى لسه مشوارك طويل
فاضل علينا كام سنة
باقى من العرب كام جيل
*****
آن أوانك يا دمشق قبل الأوان
مستكترين عليكى صوت العروبة والادان
ما أنتى يا حبيبتى وبغداد أخوان
والسياف يا أميرتى واقف ع البيبان
وأكبر كبير فى المنطقة قدامهم جبان
*****
الحجه المره دى مسخره
عاوزين أيه؟..عاوزين التار
تار مين؟..تار العرب
من مين؟..من العرب
آه يا أولاد الكلب يا جرب
من أمتى قلوبكم على دم العرب
*****
ذى الغنم متساقين كلنا للمقصلة
مش مهم مين قدام ومين ورا
قرب عليكى الدور يا قاهرة
هناك تعليقان (٢):
الله يفتح عليك يا عم شادى
أجمل أبيات هما آخر ثلاث أبيات
قلبى أتوجع لما قرأتهم
المهم نلحق نفسنا قبل المقصله
KING TOOOT
يارب يا كينج
وبعدين يا باشا احنا تلاميذ فى مدرستك
إرسال تعليق